fotografia de Pèire Azemà jovent, comunicada per nòstre amic Boissièr dau Bram dau Clapàs. 

AN NOVÈL

Sorda a nòstres sovèts (1), la vida descandèla (2)

l’encanha (3) dels jorns bòns amai dels jorns marrits ;

e de còps la trobam despietosa e crudèla

e d’autres còps cresèm qu’es doça e nos soritz.

Es pas vrai ! sap pas res, vei pas res, e s’enchauta (4)

De nautres e dels vòts estèrles que fasèm,

Ne'n fasèm, maugrat tot, de fes que i a, sens fauta,

E nos imaginam – pantaissaires que sèm –

Qu’aqueles paures mots pivelaràn l’astrada…

Benurosa illusion ! fan pas ni mai, ni mens,

mès, d’un còr a un còr, aqueles mots, pasmens,

dison l’Amor divenc o l’Amistat sacrada.

Pèire AZEMA (5)

(1) Sovèt : = vòt, desir (parlar del ponent de Montpelhièr e de provença),
(2) Descandelar : autre biais de dire : desencabdelar = debanar, desvolzar, desrotlar
(3) Encanha : = madaissa, escaut, (fr. écheveau),
(4) S’enchautar : = se trufar
(5) Pèire Azema :

Nascut e mòrt a Montpelhièr (1891 – 1967).

Emplegat de la Companhiá de las minas de Graissessac, puèi cap de burèu a la prefectura d’Erau, adjunt al conse de Montpelhièr (1935), Majoral del felibritge en 1929, sindic de la mantenença de Lengadòc (1928), president de l’IEO (1957 – 1959), president de « l’Escolo dau Parage » (1935 – 1939).

Foguèt un dels creators del jornal « Lou Gal » (1915 – 1921) e de la revista « Calendau » (1932 – 1944). Colaborator tanben de « Oc, La campana de Magalona, Le Sud, l’Echo du Vidourle, Terra d’oc, la Semaine montpelliéraine, eca… »

Òbras :

Jout un balcoun, farcejada en un acte,
La tèrra d’oc, poèma,
Lou Ciclopa, comèdia  antica en dos actes,
A boulet rouge, cronica del temps de la guèrra,
Poulitica felibrenca,
Mistral e lou lengadoc,
Mistral pouèto epic,
Rabelais en terro d’O,
Outavian Bringuier,
Carles de Tourtoulon,
La politique de Mistral,
En memoria de Louvis Savié de Ricard,
Omenage a Verdaguer,
La crisi felibrenca de 1909,
La religion de Calendal,
Pèire Causse, lou felibre de l’oulivié.

La pagina de Pèire Azemà

Las autras Cronicas radiofonicas de Pèire Azemà

Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX
Retorn a l'ensenhador generau