Gustavi FORNIER

Nascut en 1903 a Boisseron. Emplegat de la SNCF, demorava a Montpelhièr, rue Adam-de-Craponne. I defuntèt en 1990. Se disiá per escais Gustavon, o lo felibre blu. A publicat en òc: Lou Calabrun de Sant-Guilhem-dau-Désèrt (1960); "Flous dau Terraire" (1962); l'Ouccitan Gargantua (1963). Literatura d'inspiracion populara sens cap de pretencion. A agut lo meriti de manténer, a l'ora ont tot semblava perdut e ont Bodon descriviá dins sos "Grands Jorns" lo fondàs estrèm dau desespèr. E après aquelas generacions l'espèr tornèt. Qué que ne digan los cacalassaires de la premsa "locala"...

Tiram de "Flous dau Terraire" lo morsèl çai-dejota, ont los escais-noms dels vilatges son meses en rima d'un biais agradós: se'n fariá una cançon.

PARATGES OCCITANS

Dins lo Miegjorn, sèm galejaires
e nos batejam « Grands Manjaires»

Braves gents, ausissetz puslèu,
Los Clapassièrs son « Manja-Lèus

Mès a Grabèls, son de « Saussaires ».
A Castrias « Nòbles-Pausaires ».

A Sant-Drasèli, amairits,
los an batejats « Espaurits ! »

Los Setòris, en barrasqueta,
Fan la fèsta amb' una rabeta

Vilanòva, pròche dels gofres,
Son apelats « Los Manja-Pofres».

Se anatz un pauc mai aval...
Son « Febroses » à Miraval.

Quau son los qu'an un pichòt cranc ?
Es los Bosigaus « Manja-Crancs»

Totes los de Vic son « Coflats»
Las Matèlas : « Descervelats ! »

« Manja-Tòras » de Balharguet,
An la trompeta per arquet

Los abitants de Combalhòu,
An totes la clòsca d'un uòu

Los « Beulòlis » aimon Arsàs...
Valhauquès [son] « Manja-Perassas»

E, d'Aniana, los braves gents
Son apelats « Los Innocents »

A Sant-Guilhèm, tindatz esclòps
los an batejats « Sauta-Ròcs»

A Boisseron (Los boisses ronds)
Fan, au vilatge, « Grand Renom»...

 

Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX
Retorn a l'ensenhador generau