Tèxtes publicats en provençau
dins la revista:
N°75 (1979) p 397
"Odo a Anactoria"
(revirado de Safò: fainetai me khnos isoV qeoisin)
Me semblo a iéu egau i diéu
l'ome que rèsto davans tu
e tout vesin s'asseto e douço
entènd ta voues!
E toun bèu rire vesiadet
me brandis lou cor dins lou pitre;
autanlèu te vèse ma voues
subran se nouso!
S'esbrigaio d'un cop ma lengo
e linge un fiò souto ma pèu
courris: siéu tuclo e mis auriho
n'en brounzinejon.
La susour subre iéu regolo
un fremin me prèn touto, e verdo
mai qu'èrbo vène - e coume morto
iéu me sentisse!
Mai me fau viéure moun astrado.
N°76 (1980) p 316
"Sounet"
Mourdido l'ùni au toumbant de l'estiéu
e nosto amour mourtalament vóugudo
amigo! enca' n'en redirian, capudo,
la desresoun d'aledo e d'erbagiéu!
Entre l'oublit e l'espèr rescoundudo,
ié rèn coumprene e n'en resta catiéu
pèr quauque anti fachin d'auro e de niéu
acò sarié nosto astrado esperdudo?
L'amour tragu au cim de l'escalino
çai despampant entre joio e tristour
aquéu desrei aquí que se delís!
E pièi t'ama nouvello e femenino
aussant de labro alisado un countour
sus l'orle escur e caste de l'abis.
N°78 (1980) p 397
"Odo a Afroudito"
(revirado de Safò: Poikiloqron', aqanat 'Afrodita)
Divo dóu tron margaia Afroudito
de ruso oundrado enfant de Jòu te prègue
m'aclapes pas ni mai noun esfouligues
moun èime estransina!
Vène pamens ! Autri-cop te fisave
la cremesoun de tóuti mi pensado :
e tre m'ausi me revenies quitant
l'oustau d'or de toun paire!
E toun carriòu celestiau s'aboulego
e d'auceloun proumte coume lou lamp
de-vèrs la terro escuro pièi t'abrivon
au bèu mitan de l'aire!
Autanlèu soun aqui. Tu, benurouso
un risoulet sus ta caro divino
demandes ço qu'aviéu e perqué dounc
tant de tèms t'ai sounado
e ço que mai vòu moun cor trefouli:
sarié sesi quaucun mai in panteno
de l'enamouramen - pourrié belèu
Safò! te fa pati?
Se te fugis qu'autanlèu te secute
se te rebufo enfin qu'à tu s'oufrigue
e se noun vòu t'ama que coumbourigue
qu'and l'amaras pas mai...
Vène aqui mai, deliéuro me dóu pes
de ma trevanço - e se quauque desir
me ven subran, que se coumpligue mai
e siegues tu ma sousto!
Retorn a la pagina de l'autor
Retorn a l'ensenhador de la literatura montpelhieirenca
d'òc
Retorn a l'ensenhador de la
literatura dau sègle XX-XXI
Retorn
a l'ensenhador generau