Onorat Durand (Onorat del Causse)
(1913-1994)
Nascut e defuntat a Rògas sus lo causse de Blandàs, lo país magic e desconsolat de las fadas. Ne siaguèt cònsol entre 1978 e 1989. Son esposa, Adriana Durand-Tullou (1925-2000), arribèt sus lo causse en 1938 per i far regenta... e s'apassionèt per aquel terraire e la civilizacion tradicionala qu'i reinava alavetz, desempuòi sai que lo neolitic. Ne faguèt una tèsi (1959), n'escriguèt de libres nombroses, precioses tant e mai, reculiguent una matèria immensa, plenament nòstra, un pan fondamentau de nòstra cultura que se seriá perdut cap e tot sens ela....
Onorat Durand, el, èra occitanofòn de naissença e escriguèt en occitan. Animèt lo "club occitan del Vigan", en relacion amb l'occitanista ben conegut Amat Sèrra que i aprenguèt a normalizar un pauc son parlar nadiu. Es donc ben d'occitan qu'escriu, pas de "patoés"!
"Contes et légendes des Causses: contes risolièrs " fòrt volum in 2° de 268 paginas, remirablament presentat, pareguèt en 1994 en cò de Espace Sud. Agachatz un pauc la polida presentacion:
Sens autra pretencion que la de redire de contes risolièrs coma los entendiguèt, Onorat del Causse escriu una lenga gostosa e druda, la de sos vesins Fabre d'Olivet de Ganges e de dau pastor Fesquet, de Colonhac. O tanben de Loïs Stehlé dich "Del Pont de Las Cabras" (1882-1933). Lo cevenòl ganjòl. En riba dau montpelhieirenc. Es de plànher que s'i siága mes sus lo tard e aguèsse pas agut lo temps de trabalhar son estil, dins de libres ulteriors, coma o faguèron antan sos egrègis davancièrs... Lo ritme de la frasa escricha es un pauc condicionat sens o voler per lo modèl franchimand aprés a l'escòla. Mas aquò's pas grèu se miram la qualitat dau lengatge que i a aquí dedins... e lo contengut, pro gostós...
Lo libre que nos laissa es preciós. Reforfa de bònas expressions d'occitan de prumièira man sens ges de farlabica: "sos uòlhs d'un gris belugadenc", " i aviá una barbasta coma una nèu"... etc... tot aquò, o cau mancar a ges de prètz...
Lo parlar de Rògas es desenant fixat per un classic, per sempre mai...
Retorn a
l'ensenhador de la literatura montpelhieirenca d'òc
Retorn a
l'ensenhador generau
escrivans de la fin dau sègle XX