79^en CONGRES INTERNATIONAL DEL PEN 

9-12 de Setembre de  2013

Reykjavik, Islanda

 Frontièras digitalas – Dreches Linguistics e Libertat de Paraula

79 congrès mondial del PEN. 

Los occitans i èran presents, de segur. 

S'i es oficializat lo MANIFEST DELS ESCRIVANS PER LA PATZ Los occitans an propausat 2 resolucions que son passadas a l'unanimitat : que Hollande compliga sa promessa de ratificar la Carta Europèa de las Lengas, e qu'en Soïssa siá clarament admés que lo Francoprovençal o Arpitan es una lenga cap e tot. E una jove escrivana d'Oc, Maelle Dupon, es estada remarcada dins la preseleccion del prèmi " New Voices ", demest los 6 melhors tèxtes, mostrant que la lenga d'Òc luònh d'èsser mòrta pòt far espelir d'òbras dignas de concórrer a de prèmis internacionals jos la pluma d'autors de mens de 30 ans. Capitada totala donc !

Tòrne donc a Reykjavik ont fai mens polit qu’en Occitania de segur (plòja glaciala e temps nivolós). I soi estat portar las colors de nòstra cultura d’Òc dins aquel encastre internacional dau PEN.

Los que son sus la lista yahoogroupes an pogut seguir nòstras darrièiras accions, benlèu los autres ne sabon pas tot.    

Resolucions

Pense que maugrat la manca de mejans sèm pas solament perfiechament  reinserits dins la familha dau PEN, « ni cort ni costièr », mas es mai qu’aquò : nos mostram coma un dels centres mai actius, e aquò es estat dich mai d’un còp per los intervenents. Aquò se vei amb nostra implicacion dins 3 resolucions que son prepausadas, que doas son de nòstra iniciativa. 

RESOLUTION: THE PORTUGUESE LANGUAGE. Submitted by the Portuguese PEN Centre, with the support of the Catalan PEN Centre, French PEN Centre, Occitan PEN Centre, Slovenian PEN Centre and Trieste PEN Centre

RESOLUTION: URGING THE RATIFICATION OF THE COUNCIL OF EUROPE’S CHARTER FOR REGIONAL OR MINORITY LANGUAGES (1992) BY THE FRENCH REPUBLIC. Submitted by PEN Langue d’Oc, French PEN, Basque PEN, Catalan PEN, Portuguese PEN and Uighur PEN.

RESOLUTION: THE RECOGNITION OF THE ARPITAN LANGUAGE IN SWITZERLAND. Submitted by PEN Langue d’Oc and representatives of the Arpitan culture not yet represented in PEN Centres, and French PEN, Swiss Italian and Rhaeto-Romansh PEN, Swiss German PEN, Swiss Romand PEN, Basque PEN, Catalan PEN, Portuguese PEN and Uighur PEN

Lo PEN Internacional vai demandar oficialament au President Hollande de ratificar la charta de las lengas europèas. Vai tanben demandar a la Confederacion Elvetica que reconoiguèsse que l’Arpitan o Francoprovençau  es pas un patés dau francés mas una lenga a despart.  Los 3 PEN Soïsses qu’an sostengut aquel afar son estats espantats de descobrir aquela lenga qu’ignoravan, aquò a atissat lor curiositat, s’i interessan, an rescontrat de grops de gents afogats per aiçò e an acomençat de nosar de ligams amb eles. E de fiu en cordura aquò lor balha l’idèa d’aparar tanben lo « Swiss Deutsch » qu’es fin finala un lengatge germanic pro diferent de la lenga de Goethe… Sabe qu’aquel engatjament per l’Arpitan fai pas l’unanimitat dins los rengs dau PEN occitan, mas a l’avantatge de mostrar que los occitans son aquí, vius, actius, e pas replegats sus eles, afogats a aparar d’autras culturas « minoradas ». De segur amb los Catalans, los Galicians, los Bascs, los Kurds e los Oigors fasèm un rodelet motivat per aquela mena de revindicacions !!! Se parla de butar a la naissença d’autres PENs de lengas minoritàrias de l’ex-URSS e de segur serà nostre prètzfach de los sosténer.

Au congrès un afar qu’es estat remarcat tanben e que lo mond n’a parlat, aquò’s la cadidatura per lo prèmi literari « New Voices » d’una jove occitana, Maelle Dupon. Novetat qu’intriga ! Nòstra Maelle a fach un tèxt flame, es quatrena au classament e se’n guierdona pas que 3, mas a mancat de quasi pas res d’èstre dins las 3, n’ai agut la confirmacion. E de mai, los joves autors retenguts son totes dins de « grandas » lengas : dos en anglés e un en espanhòu. Donc la seleccion de la candidata occitana 4^e sus 40 candidats es una victòria espectaclosa que mòstra que la literatura d’òc fai sempre sang de nòu. E pòt figurar dins de palmarès internacionals. Manquem pas d’o far saupre !!!

Coma o sabètz sèm activament implicats dins dos dels comitats dau PEN Internacional sus los quatre : lo comitat dels dreches linguistics e de la Traduccion, de segur, e sabètz qu’avèm participat a la redaccion finala dau Manifèst de Girona per la Diversitat Linguistica, e lo Comitat dels Escrivans per la Patz. Estent solet ai pas pogut participar als dos a l’encop a Reykjavik, mas la preséncia de Pèire Pessamessa e de Miquèl Decor a Bled e a Lisbona permet que siagam membres dau Comitat per la Patz, demest los 46 centres que i son marcats, e donc implicats dins l’escritura dau Manifèst dels Escrivans per la Patz (manifèst de Bled) que serà un document important coma aquel de Girona. E de mai sèm estats membres fondators de l’ « Euro-Mediterranean Circle », frairetat dels escrivans mediterranencs, que Miquèl Decòr èra aqui a Lisbona quora se fondèt. Aquela ret Mediterranenca pren d’ample, que lo grop dels Centres PEN dels Balkans a decidit de s’i fondre, e tanben lo cèrcle dels PEN Arabs qu’a mermat sas activitats dau fach de las crisis de la Region. M’an demandat de far partida d’una lista de 6 qu’empusarián la dinamica d’aquela ret. Los occitans son a sa plaça naturala dins la Mar Latina.

Un rendut compte mai formal seguirà dins pas gaire.

JFB