2.       Rapòrt financièr.

 Lo clavaire Joan-Guilhèm Roqueta dona lo rendut compte financièr. La situacion es estadissa. La sola intrada d’argent es los escotissons. A l’ora d’aquel acamp n’avèm agut 31 siá 880 euros. En 2015 n’i aviá agut 34. Per sortida i a agut los fraisses bancaris, l’escotisson au PEN Intenacional (500 euros) e 108 euros d’assegurança a la MAIF.  Demòra 1773 euros au compte corrent e 6906 euros sus lo Libret A.

 Se pausa pasmens la question d’aver mai de mejans, e mai que mai de poder pagar los viatges als congrèsses. Seriá necite per aquò d’aver 2000 o 3000 euros per an... Pas simple d’aver una subvencion de fonccionament, ara las collectivitats territorialas subvencionan pas que de projèctes.

 Se decidís de rescontrar los responsables de la region (Patric Roux) non pas en mendicaires de subvencions mas en prepausant çò que podèm aportar (expertisa per de traduccions, etc...). E justament fai mestièr d’elaborar un argumentari metent ben tot aquò en valor, afortiguent  nostras ambicions per l’occitan. En se presentant coma un recampament d’actors engatjats que pòt prepausar una ajuda e un conselh estent que recampam los escrivans, usatgièrs exigents de la lenga, e la faciada internacionala de la cultura d’oc alargada au mond.

 E Rotland Pecot apond que podèm  convidar d’escrivans coneguts dau mond, far lo ligam amb d’autras culturas, afavorir d’escambis :  “siam de barcatièrs”.

 3.      Burèu.

J-F. Brun rapèla coma los còps passats qu’a pas vocacion a èsser president a vida coma se vei dins d’unes païses d’aquesta planeta, e que normalament l’an que ven ne caudrà prepausar un autre.  

 Lo burèu per 2016 es pas cambiat : aquí-lo :  

4.       Rendut compte de las activitats de 2015.

Rapòrt d'activitat: acamps de Bled, d’Ourense …

5.      Quanas reunions avenidoiras e ont? Projèctes de rescontres …

« Organizar d’eveniments » òsca, de segur, mas per quanas retombadas ? Coma o fasiá remarcar Danielle Julien quora se fai quicòm a Montpelhièr o a Nimes es tot un afar d’o engimbrar e puèi de resson n’i a pas gaire o pas ges, se nega dins lo bruch de fons de la bolegadissa culturala contunhosa de las ciutats. Dins un endrech mai pichon es quicòm mai, un acamp occitanista pôt far figura a de bon d’eveniment e se’n parlarà benlèu. Pro que se pensèsse tanben a n’orquestar lo resson. Aquô estent dich se refai lo torn dels projèctes.  

 5.1 Projècte de rescontre amb los berbèrs

 Joan-Guilhèm Roqueta nos indica que per aquel projècte imaginat a l’acamp de l’annada passada s’es demandat una subvencion a la metropôli de Montpelhièr. Que sabèm pas trôp fins ara se serà graciosada. E esperant d’o saber gardam de segur aquel projècte e veirem cossí lo realizar en fonccion dels majans.  

-                    

-           5.2  per 2017 : acamp a Somalh amb la frairetat mediterranenca dels PENs (=ALEM) que sembla ben adralhat

 Miquèl Decôr nos rapèla l’afar. Cada an a Bled lo PEN per la Patz (seccion dau PEN Internacional) se recampa. E ne sortiguèt l’idèa d’una frairetat mediterranenca que se creèt a Lisbona. Lo Cercle Euromediterranenc dels escrivans per la Patz. Se faguèt adonc en 2015 l’acamp de Narbona. Lo cônsol de Narbona avia promés de publicar los actes mas puoi quora lo reculh siaguèt lèst, se diguèt que i avia pas l’argent. Lo referent Ourrit sus l’Agglo de Narbona aguèt l’idèa d’integrar dins la Festa d’Oc de l’agglo un eveniment dau PEN d’Oc sus la besala de Riquet, a Somalh. Es un luòc polit ont s’arrestavan lo mond sus lo canal. I a un ostau de l’agglò qu’auriam a posita. Sus plaça i a de cambas d’òste. Es a 15 km de Narbona.

 Data prepausada : 29 junh 2 julh. Lo dimenge 2 sèm convidats a Pesenàs a la Ronda dels Gigants e dels Totems d’Europa. Un vintenat de personas inscriches, amb d’escrivans de tria.

 Pensam que deuriam convidar lo PEN Català (Carme Arenas),  lo PEN Haïti, etc…. . De subjèctes son ja pressentits:    Pecot : Poesia dau Nord e dau dau Sud a la Cort d’Ermengarda…Una intervencion  de Miquèla Stenta sus las  femnas e la civilizacion trobadorenca, un omenatge a Marcèla Delpastre. L’idèa latina, una utopia per la patz...

 5.3-      proposicion de Claudi Sicre que lo PEN occitan se recampèsse a l’universitat occitana de la Guépia, o poiriam far 1 an sus dos en alternància amb Somalh ?

 Oc, acceptam de segur lo projècte, o caudraà far tre 2018

 5.4 -     Proposicion de Sèrgi Javaloyès d’un acamp a Pau, cal escriure una letra au novèl cònsol de Pau Francés Bairon…

 Sèrgi nos mandarà mai d’entresenhas sus lo projècte exacte.  

caudrà tornarmai preveire d’acamps dins d’autres endreches dau païs (Nissa ? Pau ? Clarmont ?)...

PREPARACION D’UNA RESOLUCION PER LO CONGRÈS VENENT QUE SE TENDRA A Lviv en Ucraina

 Serà l’escasença que metèssem en forma una version actualizada de la resolucion qu’aviam mandada a Johannesburg sus la marrida evolucion de la situacion de las lengas dichas « regionalas » en França, qu’ai pas presentada a Ourense perqué m’i soi pres tròp tard. Cau riblar aquel clavèl en 2017 e far saupre au mond cossí la Patria (autoproclamada) dels Dreches de l’òme se singulariza en Euròpa per una regression espectaclosa  sus lo plan dels dreches linguistics.

 6.      Estrategias per afortir nòstra dinamica dins la durabilitat avançar e s’inscriure dins la durada.

 Començam amb una citacion de Castan.

 D’unes endreches de l’ensèms occitan son mai sensibilizats sus la cultura d’òc (D’unes airals de Cevenas, las Corbièiras…) es logic de s’apiejar dessús dins la dinamica, ni que la tòca siá d’afortir la cultura occitana dins lo país entièr.

 Lo problèma es d’alargar nòstre rodelet dau PEN òc sens i far pèrdre son èime. Pòt pas èstre un club pichonet dels escrivan mai ambicioses barrat a totes los autres, coma sembla que siá estat, e aquò li aviá vaugut de s’anequelir e de tombar dins la sòm. Coma sabèm.

 Per lo moment una estrategia realista es de començar de pròche en pròche amb d’actors culturals au sens larg.

 Rotland Pecout demanda : « mas de qué i prepausarem que los atirèsse ? » Pas de  segur de se recampar amb de vièlhs ni de pagar d’escotisons, ni d’èstre infeudats a una ierarquia.

 Cau imaginar una tièira de çò que podèm prepausar :

 -          Los publicar dins d’antologias,

-          Los faire anar a de rescontres internacionals ont poiràn descobrir pro de causas e de mond interessants tot au rebors de la logica d’embarrament

-           Un projècte mai luònh seria de recampar dins un acamp de representants de « totes los creators en Occitania »…

 -           Encoratjar l'espelison d'una nòva generacion d'escrivans. Prèmi « New Voices »…

 Portar lo mond a escriure en òc. R Pecout nos rapèla que JC Belmon fasiá de formacions au manejar de la camerà. Per l’escritura pòt èsser parièr e encar mai aisit s’implicam los escrivans dau PEN occitan.

 Se pòt ja envisatjar una collaboracion frairala entre ainats e mai joves per mehorar lo nivèl de lenga escricha d’aqueles qu’an pas recebut l’occitan nadiu dins sa joinessa e se lo reaproprian coma pòdon. A aquel nivèl pòt fonccionar – e foncciona ja un pauc - sens ges de besonh de mejans especials.

 6.3              Estrategias per rebombir sus la denominacion nòva de la « region Occitania ».

 Lo PEN occitan aviá manifestat sas resèrvas sus la possibilitat que se sonèsse la nòva region LR+MP « Occitania ».

Lo costat negatiu d’aquò, es que risca d’acreditar que 50% dau territòri de nòstra lenga se deu pas considerar coma « Occitan ». E aquò pòt èstre grèu per lo projècte cultural tant occitanista coma felibrenc qu’es clarament panoccitan. D’aitant mai que justament i a d’activistas dau trocejament fòrça bruchoses e verinoses que n’aprofiechan per denegar tota occitanitat a Provença, Bearn o Auvèrnhe… E los elegits los escotan…

Lo costat positiu èra que los noms « Occitan » e « Occitania » an pas pus res de clandestin o de mitic, son apegats dau mai oficialament que se poguèsse a un territòri vertadièr.

Nos cau donc reflechir a una estrategia per la lenga e la cultura en fonccion dels noms definitius de las nòvas regions, e de cossí vesèm qu’aquelas d’aquí estructuran lor politica linguistica. 

 Doas endrechièiras d’accion :

a    a)      Afortir la panoccitanitat

Imaginar un esquèma explicant que la « Région Occitania » es una compausanta dinamica de l’ensèms d’òc mas lo representa pas tot.

Aficheta e t-shirt region vs païses occitans.

Definir  un nom per l’ensèms entièr : «païses occitans » ??? o quicòm mai ? Nos cau trabalhar aquí dessús… …

 b)     Butar a una preséncia de mai en mai efectiva e « normala » de la lenga occitana, d’en pertot sus son airal mas màgerment sus lo territòria de la region qu’a pres aquel nom !

 Logicament la « Région Occitania » deuriá aver una politica fòrta per l’Occitan. La candidata Caròla Delgà o anonciava dins son programa, e sembla que son accion dempuòi que baileja la region es efectivament fòrça favorabla a l’Occitan. Las divèrsas associacions occitanistas an de s’implicar dins aquela dinamica e de trabalhar a la renfortir dau mai que pòdon. Lo PEN occitan a logicament la possibilitat de portar de causas a aquela accion : implicacion dels escrivans, actors fòrts de la lenga, recampats en malhum actiu e motivat, representacion de nòstra cultura a l’estrangièr dins un dels forums cultrals mai prestigioses que i aguèsse.

 Aquò passa en practica per de contactes amb los responsables culturals de la regions, e mai especificament de la « Region Occitania »…

 6.4 Traduccion : ont ne sèm ?

 Començam aquel capítol en legissent una letra de Teiriç Òffre : « Benlèu qu'avèm de quichar sus lei reviraradas per alargar tot aquò que siam pas espés ara de poder legir directament l'occitan, mai que mai se la lenga es druda e lo mond an gaire d'interest a bèus uelhs vesents per la literarura occitana dempuèi d'annadas subretot en Provença. ». 

Aquò nos buta a abordar rapidament divèrsas possibilitats. Traduccions e jostitolatges en occitan de films.  E se pausa la question de l’occitan present en public. Noms de carrièiras en occitan : bilingues o unilingues. Un occitan public que deu servar sa diversitat intèrna. Aquò pausa lo problèma de manca de concertacion. E tanben lo problèma de l’ortografia occitana de mau legir. Los noms dins los TER e trams/ se deuriá respiechar l’usatge  Deuriam far un document consensual.

7.      Questions divèrsas : Lo grand prèmi literari de Provença a Ventabren :

 Pessamessa es dins la jurada. Qu’a un laureat en Òc (un an un mistralenc un an un occitan), e un en francés. Ongan l’occitan siaguèt Felip Martèl. Nos explica un pauc cossí o vei. .

 8.      Legissèm e comentam los corrièrs d’unes membres absents a l’acamp qu’apondián d’elements importants a la discutida…

 Teiriç Offre

9) En practica :

 a)      Rescontrar

 Rescontre amb Roux e amb Barral per prepausar de s’implicar  dins la politica per l’occitan de la region e de la ciutat de Montpelhièr

 b)     escriure per convidar

 Convidar de mond (jornalistas, etc… a èsser membre dau PEN d’Oc) …

 c)      elaborar de documents consensuals