SECCION 
SECCION
DE LENGA D’OC
DEL PEN-CLUB INTERNACIONAL
RENDUT-COMPTE DE L'ACAMP
GENERAU DE REVISCOL DAU
P.E.N. CLUB DE LENGA D'OC
lo 21 / 12 / 2008 a Montpelhièr
Presents : Bizot M. , Brun J.F., Capredon J., Carles S., Creissac J.P., Décor M., Forêt J.C., Geurten David (lou Dàvi), Giroussens P., Grande G., Javaloyes S., Julien D., Landier J., Lassaque A., Offre T., Pecout R., Petit J.M., Poitevin M., Regord A., Rixte J-C, Rixte M.C., Surre-Garcia A., Vernet F.
Representats (poders bailats) : Assemat C., Barsotti
G., Bec P., Bec S., Benedetto A., Casanova J.Y., Chadeuil M., Champel G.,
Courthiade M., Deleris F., Delmas J.J., Flechet J., Fourie J., Gardy P.,
Garrigues R., Jumeau R., Lagarde A., Lavit J.L., Lescou L., Lesfargues B.,
Martel P., Mathieu G., Montanaro M., Pages A., Pamprun T., Petit J.M., Pic F.,
Rigouste J., Roche R., Sauvaigo J.L., Torreilles C., Toquebiol J.C., Vazeille
J.B., Verdier J.P., Verny M.J., Vezole J.
PRESENTACION
Roland Pecout a dubert la sesilha en presentant lo projecte de relança dau
P.E.N. Club de lenga d'òc, projecte ja evocat dins lo tèxte : Per dubrir lo
talh. Emai la creacion literària en lenga d'òc se siágue pas jamai arrestada
dempuèi mil ans, se pòu dire que vuèi, sa vesibilitat sociala demòra pron
teunha dins una pontannada onte la diversitat culturala e linguistica es en
dangièr, mentre que l'aisina internet, e es paradoxau, baila una espectaclosa
capacitat de mediatizacion.
Dempuèi 1963, data de creacion dau P.E.N. Club de Lenga d'òc, aquela
associacion ajuda la literatura d'òc a aparéisse dins tota sa diversitat.
Cadun i pòu venir coma escriveire, poèta, o assajaire d'òc. Serà pas pasmens
fòrça aisat de faire espelir la creacion d'òc dins lo contexte francés,
europenc e internacionau. La còla anteriora compausada d'escriveires ambiciós
a conegut fòrça estèus e se compren facilament coma lo P.E.N. Club de Lenga
d'òc, pauc a cha pauc, s'es aconsomit e mes en ibernacion. Pasmens, per astre,
creacion literària en òc e cèrcas sus lo domèni d'òc an pas jamai arrestat
amb d'actors d'aicí emai d'alhors.
PREPAUSICIONS
Per relançar lo P.E.N. Club de Lenga d'òc,
vaquí d'unei prepausicions somesas ai participants :
- mesa en plaça d'una còla que se tornariá cargar administrativament dau
P.E.N. Club de Lenga d'òc (amb l'amira de travalhar collectivament cotria amb
leis escriveires totei). Una còla s'es prepausada amb J.F. Brun coma president,
S. Chabaud coma segretari (non present mai a bailat son acòrd escrich) e
Tierrí Offre coma clavaire.
- travalhar dins un èime de dubertura, aquel èime que Max Roqueta nos en
mostrèt sempre lo camin, coma lo remembrèt Joan-Guilhem Roqueta en
introduccion (totei lei que fan de creacion literària en òc an sa plaça au
P.E.N., totei lei grafias son admesas).
- sortir lei tèxtes en lenga d'òc de sa situacion de ghettò, i donar un
enavans nòu, bailar ansin una ambicion nòva de socializacion a la lenga d'òc.
En òc, la literatura coma lo teatre e la cançon son de luòcs de socializacion
de la lenga. I a una responsabilitat deis escriveires davans la societat. I a
doas motivacions per escriure en òc, complementàrias :
o l'enveja d' escriure .
o la responsa a una demanda sociala (per exemple, libres per enfants, istòria,
reportatgis...)
- afavorisar d'escambis, de rescòntres tant au nivèu nacionau qu'internacionau
amb d'autreis escriveires.
- es una lei dempuèi Jules Ferry de desseparar, d'un biais ideologic, l'ensenhament,d'un
latz,e la vida sociala o la vida vidanta,d'un autre .Lo vam d'oc a travalhat (ensenhaires
e escriveires cotria, dempuèi un segle, per cambiar aquò...) E lo P.E.N. a un
ròtle a jogar per interrogar e faire evoluir lei causas, coma grop de mond
actius dins la cultura d'òc.
Son estat legits de corrièrs d'escriveires (J.Y. Casanova, C. Rapin, C. Sicre,
S. Bec…) qu'an pas pogut venir, mai que s'associan a n'aquel caminament.
DEBAT
A. Surre-Garcia, T. Offre, M. Decòr, S. Carles e M.C. Rixte an evocat d'estrategias
possiblas, basadas sus l'escambi, e la necessitat de la revirada dins lei dos
sens (òc devers lenga autra e lenga autra devers òc). Necessitat per lei
reviradas òc-francès d'impausar la preséncia dau tèxt originau en òc. A.
Surre-Garcia prepausèt de travalhar amb de reviraires poliglòtas que se
podriàn passar dau recors au francés. Trobar per cada lenga a revirar una
personalitat de referéncia que podriá nos representar.
R. Pecout afortís la necessitat de recentrar lei causas : se recampar sus l'escrich
e la creacion en òc, sens se dire qu'anam cambiar lo mond, mai que si recampam
sus nòstre saupre-faire, nòstra volontat de faire passar un contengut, un
"mestièr", un travalh, un pretzfach. Es important aquela umilitat
ligada a una ambicion. Mai d'un an particularament mes l'accent sus lo liame
entre lenga d'escritura e lenga de l'oralitat, valent a dire que cau tornar a
una fònt linguistica, aquela de la musica de la lenga rajant de la garganta...
Question recurrenta : aquela de la difusion de tota literatura en lenga
minorisada,coma o ramentan J.P. Creissac, J.C. Forêt e J.M Petit, editors
presents. Es decidit que sarà un dei temas de discutida d'un dei rescòntres
avenidors.
D. Julien pensa que lo P.E.N. se deu recentrar sus son especificitat ligada a l'escritura
e sus la difusion de la literatura d'òc. Fau travalhar amb l'I.E.O., l'A.I.E.O.,
leis ensenhaires, lo CIRDOC, tot l'ample dau mond culturau e associatiu, mai lo
P.E.N. es ben especific dins sa tòca.
S. Carles afortís l'importància de ligar la literatura amb leis autres biais
d'expression de la lenga (cançon, teatre, jornalisme…)
S'agís de s'apiejar sus l'eiretatge e de faire sortir de l'ombra leis òbras
passadas, lei creacions mai tanben lei recèrcas, en particulièr aquelei dau
sègle XX, tot lo travalh, de-còps silenciós, deis escriveires de lenga d'òc
dins lo cors dau sègle. Una dei tòcas primièras serà de realizar una banca
de donadas d'aquel corpús (e tanben dei reviradas) coma o suggeriguèt A.
Surre-Garcia, e de cercar tanben de tèxtes critics, d'articles de fons a
revirar.
D'autrei direccions son evocadas : engimbrar d'estagis, participar a de revistas.
Lou Dàvi, slamaire plen d'estrambòrd e de vòlha, a représ l'idèia de far
córrer melhor la creacion d'òc amb una camba dins l'escrich, l'autra dins l'oralitat.
DECISIONS E TÒCAS
o Cercar d'ajudas en cò deis elegits (ajuda dei comunas, despartiments, regions,
estats, sens doblidar Euròpa e euroregion).
o Editors : Aprèp discutida amb J.C. Forêt e J.P. Creissac, las causas son
vengudas mai claras : fòrça editors de lenga d'òc son tanben escriveires.
Adonc son sòcis dau PEN. Totei leis autres editors que sens escriure en òc,
son engatjats dins la publicacion de la matéria d'òc, an totei sa plaça coma
Partenaris dau PEN (cercaires, jornalistas, intervenents culturals, aquelei que
trabalhan en francès o en d'autrei lengas.)
o Talhièrs d' envisatjar : liame entre literatura e societat ; alargament dau
domèni de la revirada ; relacion entre lenga eiretada, lenga orala, d'un latz,
e la lenga coma otís d'escritura d'autre latz.
o Fèsta annadièra per ligar cultura d'òc e temas dins l'actualitat e la
diversitat dau mond.
o Lei pretzfachs son a s'amadurar per l'estiu. Projectes de rescòntres (Revirada,
difusion) e aurem besonh de la contribucion de totei per metre au ponch lo
contengut e l'organizacion).
o Faudrà metre au ponch una tièra de partenaris possibla dau P.E.N. Que cadun
mande sei prepausicions. L'acamp dau Conseu lei 28 e 29 de març recamparà leis
informacions e leis entresenhas que mandaretz.
VÒTES
Leis estatuts (jonchs) son estats mes au vòte. Acceptats a l'unanimitat dei
presents (21 au moment dau vòte). S'i son aponduts lei votz dei poders. En tot,
57 votz.
Ges de candidatura autra qu'aquelei prepausadas per constituir un Burèu.
J.F. Brun afortís la necessitat de se recampar dins un esperit de dubertura e
de respiech mutuau, en abaucant lei garrolhas dau passat que nos enrebalarián
fatalament vers una autò-destruccion. Se presenta coma president en tota
umilitat en seguida de demandas collectivas.
Las candidaturas dau Burèu son estadas sotmesas au vòte e acceptadas a l'unanimitat,
siá 57 votz amb lei poders.
Lo Burèu es constituit de : Baile (President)
: Joan-Frederic Brun
Vici-Presidents : Crestian Rapin
Sergi Javaloyès (Gasconha)
Daniela Julien (Provença)
Peire Anghilante (Valadas)
Segretari : Silvan Chabaud.
Clavari : Tierrí Offre.
An respondut favorablament au rampèu de
candidaturas per lo Conseu :
S. Carles, J.P. Creissac, M. Decòr, J.C. Forêt, G. Grande, A. Lassaque, R. Pecout, A. Surre-Garcia, F. Vernet. (e mai lei membres dau Burèu).
Un acamp dau Conseu es previst a Tolosa lei 28
e 29 de març de 2009.
Per lo Bureu : Tierrí Offre.
Un forum dau PEN Club de Lenga d'oc es
disponible sus internet. Picar :
PEN Club occitan